L-ankra tar-ruħ

Għeżież għalliema tar-Reliġjon,

Qegħdin inħejju ruħna għall-Ġublew 2025 li għandu bħala tema “Pellegrini tat-Tama”. Il-missjoni tagħkom bħala għalliema tar-Reliġjon għandha tagħmilkom tassew dawk li jwasslu t-tama lil tant studenti li tiltaqgħu magħhom.

Nixtieqkom, qabel xejn, tinnutaw dak li hu speċifiku għat-tama Nisranija. Il-kelma “tama” għal ħafna nies tfisser li hemm xewqa għal xi ħaġa tajba jew aħjar, imma hemm ukoll dubju u inċertezza. Meta ngħid: “nittama li jkolli riżultati tajbin”, hemm ix-xewqa u stennija ta’ xi ħaġa tajba imma hemm ukoll, fil-qiegħ, id-dubju, l-inċertezza. Hu għalhekk li min hu xettiku jħobb juża l-espressjoni bil-Malti “min jgħix bit-tama jmut bil-piena”.

Imma t-tama Nisranija mhijiex mibnija fuq xewqa mħallta ma’ dubju. Mhijiex mibnija fuq l-inċertezza. Hi msejsa fuq iċ-ċertezza tal-imħabba ta’ Alla li ssawbet fi qlubna permezz tal-Ispirtu s-Santu. It-tama Nisranija twieġeb għad-dubji tagħna li nħossu fil-fond ta’ qalbna, iva, imma hija tama li għandha l-bażi f’din l-imħabba li ma tqarraqx bina.

Kif jgħid il-Papa Franġisku fil-Bolla tal-Indizzjoni tal-Ġublew, it-tama hija l-“ankra tar-ruħ” (Lhud 6:19). Titwieled mill-imħabba u tissejjes fuq l-imħabba ħierġa mill-Qalb ta’ Ġesù minfuda fuq is-salib. “Alla, għani fil-ħniena, bis-saħħa tal-imħabba kbira li biha ħabbna, meta konna mejta minħabba dnubietna, tana ħajja ġdida flimkien ma’ Kristu, qajjimna miegħu, u qegħedna fis-smewwiet ma’ Kristu Ġesù, biex juri fiż-żminijiet li ġejjin l-għana bla qies tal-grazzja tiegħu bit-tjieba li wera magħna fi Kristu Ġesù” (Ef 2:4-7).

It-tama Nisranija ma ċċedix fid-diffikultajiet. Ix-xbieha tal-ankra, li l-Papa Franġisku jsemmi, tgħinna nifhmu l-istabbiltà u s-sigurtà li, qalb l-ilmijiet imċaqalqa tal-ħajja, jista’ jkollna jekk nafdaw fil-Mulej Ġesù. It-tempesti ma jegħlbuniex, għax aħna ankrati fit-tama tal-grazzja, li kapaċi tagħtina l-ħajja fi Kristu waqt li negħlbu d-dnub, il-biża’ u l-mewt.

Is-sejħa lilna hija li nagħrfu nħaddnu din it-tama li tagħti l-orjentament, tindika d-direzzjoni u l-finalità tal-ħajja tagħna. B’dan il-mod, nistgħu nkunu tassew dawk li nwasslu t-tama lil dawk li magħhom inkunu fi djalogu waqt il-ħidma edukattiva tagħna bil-kelma tagħna, kif ukoll bl-azzjoni tagħna – b’ħarsa fraterna, b’widna sinċiera, b’servizz ġeneruż.

Il-Mulej iberikkom.

 Joseph Galea Curmi

Għeżież Għalliema tar-Reliġjon,

Qegħdin propju f’nofs is-sajf Malti. Dan huwa żmien li lilna joffrilna ftit opportunità li nieqfu mill-ħidma tas-soltu biex nirrikrejaw lilna nfusna. Kemm hija ħaġa tajba li nkunu kapaċi nieqfu u nistrieħu ftit mill-ħidma tas-soltu biex imbagħad nerġgħu nidħlu għall-impenn tat-tagħlim b’ħeġġa kbira.

F’dan kollu ejjew napprezzaw ir-rigal taż-żmien li ġej minn Alla. Aħna fil-ħajja tagħna ngħaddu minn mumenti differenti li lilna jagħtuna ċ-ċans li nagħmlu esperjenza tas-sabiħ tal-ħajja, u meta jkollna ċans li nieqfu u naħsbu nindunaw kemm ħafna drabi ngħaddu minn ħaġa għall-oħra mingħajr ma napprezzaw il-mument ta’ dak il-ħin. Donnu nidħlu f’sistema organizzata b’tali mod li ma jkollniex ċans li nieqfu ftit u naħsbu fis-sabiħ ta’ dak il-mument partikulari fil-ħajja, biċ-ċans li nitilfu, jew ngħaddu minn ħdejn dak li hu sabiħ mingħajr ma aħna lanqas biss nintebħu bih. Inkunu qisna nies li qegħdin taħt il-loppju u ma nindunaw b’xejn.

Ħafna drabi din hija wkoll is-sitwazzjoni ta’ dawk li jkunu afdati f’idejna biex nedukawhom; fil-każ tagħna biex nedukaw id-dimensjoni reliġjuża fil-ħajja tal-bniedem. Ejjew mela niftħu għajnejna u nkunu aħna stess li nkunu dejjem konxji ta’ dak li qed jiġri madwarna biex din l-attitudni fina nkunu nistgħu wkoll ngħadduha lit-tfal, adolexxenti u żgħażagħ li huma afdati f’idejna għall-edukazzjoni reliġjuża tagħhom.

Jekk xi ħadd ikun irid jikkuntattjani dejjem jista’ jsibni fuq in-numru 79603872 jew bl-email [email protected]

Għeżież Għalliema tar-Reliġjon,

Wasalna lejn tmiem is-sena ta’ sena skolastika oħra. Bħal kull sena oħra, din kien fiha dak li lilna jagħtina sodisfazzjoni, u dak li jaqtgħalna qalbna. Dak li jagħtina sodisfazzjoni jaqbeż u jiżboq bil-kbir dak li lilna jista’ jaqtgħalna qalbna. Ejjew ma nħallux lilna nfusna nintrikbu minn attitudni negattiva jew pessimista, ħalli dan ma jisfukalniex l-enerġija u l-konċentrazzjoni tagħna minn dak il-ġid li aħna nkunu qegħdin nagħmlu, ħafna drabi mingħajr ma nintebħu.

Din is-sena kellna ukoll ċans li jkollna sessjoni COPE għall-għalliema tar-reliġjon tal-iskejjel sekondarji. Din is-sessjoni kienet pożittiva ħafna u tat kuraġġ lil diversi għalliema biex ikomplu jistinkaw ħalli s-suġġett jibqa’ interessanti u rilevanti. Nixtieq minn hawn nirringrazzja lil kull min ta’ sehmu biex jiġu ppreparati dawn is-sessjonijiet u biex jitwassal l-aqwa materjal lill-għalliema. Ir-ringrazzjament speċjali tiegħi imur għall-EO Antoinette Laferla, u lill-Kapijiet tad-Dipartiment, kemm tal-iskejjel tal-Istat, kif ukoll tal-Iskejjel tal-Knisja li ħadu l-inkarigu li jippreparaw u jwettqu dawn is-sessjonijiet bil-għajnuna ta’ esperti oħra fil-qasam.

Infakkarkom li baqgħalna appuntament ieħor importanti fil-11 ta’ Ġunju li ġej fis-6pm. Din hija l-ewwel laqgħa ta’ djalogu mal-Arċisqof Charles Jude Scicluna. Għalkemm din hija laqgħa li fiha intom liberi li tattendu, inħeġġiġkom biex tkunu preżenti ħalli nkomplu nagħmlu kuraġġ lil xulxin fil-ħidma tagħna.

Rev. Prof. Carl-Mario Sultana

Delegat

Jekk xi ħadd ikun irid jikkuntattjani dejjem jista’ jsibni fuq in-numru 79603872 jew bl-email [email protected]

Għeżież Għalliema tar-Reliġjon,

Fl-Ittra Pastorali għal żmien ir-Randan ta’ din is-sena, jiena qsamt magħkom ftit ħsibijiet fuq ħames barkiet u doni mislutin mill-Innu Malti. Dawn huma d-dehen, il-ħniena, is-saħħa, il-għaqda u s-sliem. Xtaqt li nerġa’ nipproponilkom li tirriflettu fuq dawn il-ħames valuri mhux biss biex tgħixuhom intom bħala għalliema imma biex fir-rwol tagħkom ta’ edukaturi tkunu intom stess li tipproponuhom mill-ġdid lill-istudenti tagħkom bħala gwida għall-ħajja tagħħom.

Id-don tad-dehen huwa don prezzjuż ħafna għaliex permezz tiegħu il-bniedem jagħraf jagħżel dak li hu tajjeb minn dak li hu ħażin. Forsi din hija l-aktar ħaġa evidenti f’kull sistema edukattiva: li l-istudent jitgħallem jixtarr u jagħżel dak li hu tajjeb, lilhinn mill-interessi personali.

Id-don tal-ħniena jgħinna biex inkunu l-ħin kollu b’għajnejna u widnejna miftuħin biex nisimgħu il-karba tal-proxxmu tagħna. Dan qed isir aktar diffiċli fid-dinja li fiha qegħdin ngħixu. Mill-banda l-oħra l-ambjent tal-iskola u tal-klassi jagħti lill-istudenti ħafna possibilitajiet li juru din il-ħniena ma’ xulxin; li jisimgħu il-karba ta’ dawk li huma fil-bżonn, imqar ta’ sinjal ta’ maħfra.

Id-don tas-saħħa jiftħilna l-bibien biex inħarsu lejn il-bniedem b’mod sħiħ. Hawn għandna fejn naħdmu ħafna mal-istudenti li ħafna drabi jista’ jkun li ftit jagħtu importanza lis-saħħa spiritwali. Bħala għalliema intom tinsabu f’pożizzjoni privileġġjata biex tgħinu lill-istudenti jagħmlu esperjenza spiritwali sabiħa, u li meta tikkumplimenta s-saħħa fiżika tal-bniedem toħroġ b’mod aktar ċar il-kobor tal-bniedem u x-xbieha ta’ Alla li hemm fil-bniedem.

Id-don tal-għaqda huwa ferm importanti għas-soċjetà li qegħdin ngħixu fiha. Jekk ma tkunux intom l-għalliema ħolqa f’din il-katina li flimkien ma’ oħrajn issaħħaħ il-għaqda, allura nkunu qegħdin noħolqu soċjetà li teqred lilha nnifisha. Hija l-għaqda li ġġib il-prosperità u l-ġid lil kull settur fis-soċjetà.

Fl-aħħar hemm id-don tas-sliem li jibni fuq dawk ta’ qablu. Is-sliem ma jiġix mix-xejn, imma mill-fatt li l-bniedem ikun f’paċi miegħu innifsu, mal-oħrajn u wkoll ma’ Alla. Is-sliem huwa r-rigal li offra Kristu Rxoxt lid-dixxipli tiegħu u qed joffrih lilna wkoll illum. Imma dan is-sliem irridu naħdmu għalih u rridu nedukaw lill-istudenti li dan ma jiġix waħdu. Is-sliem huwa frott l-għaqal u frott it-tiftix tal-bniedem għall-paċi.

Meta l-bniedem jibda jgħix dawn il-ħames doni, allura jkun qiegħed jgħix il-frott tal-Għid li kisbilna Ġesù bil-mewt u l-qawmien tiegħu mill-imwiet. Dan hu dak li qegħdin niċċelebraw f’dawn il-ġranet. J’alla lkoll kemm aħna nagħrfu l-bżonn li ngħixu aħna stess dawn il-valuri u li nedukaw lill-oħrajn biex jgħixuhom ukoll.

Il-paċi magħkom.

✠ Charles Jude Scicluna
    Arċisqof ta’ Malta

Għeżież Għalliema tar-Reliġjon,

Erġajna bdejna sena ġdida u bħas-soltu ż-żmien ma jistenna lil ħadd; jaqbad għaddej u jgħaġġel mingħajr ma jistenna lil ħadd. Inħoss li filwaqt li din hija ħaġa tajba għax tfisser li aħna qegħdin nagħmlu ħilitna biex intejbu lis-soċjetà li fiha qegħdin ngħixu, imma fl-istess waqt jista’ jiġrilna wkoll li lanqas nagħtu każ li aħna nistgħu inkunu qegħdin nitkaxkru mill-ġirja tal-ħajja mingħajr ma nindunaw!

Din hija xi ħaġa li rridu noqgħodu tassew attenti għaliha; faċli li nintrikbu mir-rutina u allura ma nibqgħux konxji b’mod sħiħ ta’ dak li nkunu qegħdin ngħixu u nagħmlu. Meta ninqabdu f’dan il-kurrent inkunu aktar qegħdin neżistu milli ngħixu. Illum hawn movimenti sħaħ li qegħdin jipproponu l-mindfulness. Dan huwa mod wieħed biss kif ma nħallux lilna nfusna nitkaxkru mill-kurrent li normalment nidħlu fih minħabba s-soċjetà li qegħdin ngħixu fiha.

Il-preokkupazzjoni tiegħi hija li jekk aħna ma nkunux konxji tal-mument li fih aħna qegħdin ngħixu, ftit nistgħu nindunaw bil-grazzja li Alla jkun qed jagħtina fih, u permezz tiegħu. Barra minn hekk, ikun ukoll ferm diffiċli għalina li aħna niġbdu l-attenzjoni tal-istudenti biex ikunu konxji tal-mument ta’ issa jekk aħna stess ma nkunux konxji u qegħdin ngħixu l-mument b’mod sħiħ. Aħna nafu kemm hu importanti għall-istudenti tagħna li jgħixu u jgawdu l-mument mingħajr ma jitkaxkru mill-kurrent. Min jaf kemm-il darba ġbidna l-attenzjoni tagħhom dwar dan. Imma l-ewwel ejjew nibdew aħna bl-eżempju tagħna nuru li qegħdin ngħixu l-mument u napprezzaw dak li Alla jagħmel magħna.

Ejjew nibqgħu ngħixu l-mument b’mod sħiħ; ejjew ngħixu u mhux neżistu.

Jekk xi ħadd ikun irid jikkuntattjani dejjem jista’ jsibni fuq in-numru 79603872 jew bl-email [email protected]

Għeżież Għalliema tar-Reliġjon,

Wasalna f’mument fis-sena tagħna li dejjem ikun interessanti, mhux biss għaliex ikun mimli attività, imma wkoll għax bħala bnedmin dejjem infittxu li ntemmu ħaġa u nibdew oħra. Dan jiġrilna kull sena meta tispiċċa sena u nibdew oħra, dejjem bit-tama li din is-sena l-ġdida tkun aħjar minn dik ta’ qabilha. Imma ejjew ma nħallux dan il-ħsieb u dawn l-attivitajiet itellfuna minn dak li hu verament l-ispirtu tal-Milied: Alla li jċekken lilu nnifsu u jsir bniedem bħalna biex isalvana.

Dawn huwa l-qofol tal-Milied u dan huwa li niċċelebraw f’dawn il-ġranet: li Alla ma ddejjaqx mill-ħażen tal-bniedem, u tbiegħed minnu, imma tqarreb lejna biex ikun jista’ joffrilna l-id tal-ħbiberija mill-ġdid permezz ta’ Ibnu Ġesù. Ejjew nagħrfu l-kobor ta’ dan il-misteru li se nerġgħu niċċelebraw għal darba oħra: Alla li jsir bniedem bħalna biex ikun id-dawl fit-triq tagħna.

Fl-istess waqt, ejjew ma nħallux dan li qed niċċelebraw ikun xi ħaġa ta’ dan iż-żmien biss, jew li niċċelebrawh biss fil-25 ta’ Diċembru ta’ kull sena. Bħala għalliema aħna msejħin biex inkunu dawl għal dawk l-istudenti kollha li Alla jogħġbu jafdalna f’idejna. Aħna għandna din is-sejħa speċjali li ngħinu lil Ġesù u t-tagħlim tiegħu jitwieled mill-ġdid fil-qlub ta’ dawn it-tfal, adolexxenti u żgħażagħ. Ejjew nagħrfu din ir-responsabbiltà li għandna: li nkunu aħna l-istrumenti f’idejn Alla biex hu jibqa’ jgħammar fil-bnedmin tallum; nibqgħu aħna stess nagħtu kontribut biex id-dawl ta’ Alla jasal fil-qlub tal-bnedmin.

Nawgura lilkom u lill-familji tagħkom Milied hieni mimli bil-barka tal-Mulej, u sena ġdida tajba.

Jekk xi ħadd ikun irid jikkuntattjani dejjem jista’ jsibni fuq in-numru 79603872 jew bl-email [email protected]

Għeżież Għalliema tar-Reliġjon,

Bħalissa l-kelma fuq fomm kulħadd hija: ‘erġajna lura lejn il-bankijiet tal-iskola’. Dan jgħodd speċjalment għat-tfal li wara l-vaganzi tas-sajf issa reġġgħu daħlu għar-ritmu normali tax-xogħol fil-klassijiet. Imma dan mhux neċessarjament hu l-istess għall-għalliema. Dan għaliex l-għalliema, għalkemm ma jibqax ikollhom l-appuntamenti normali mat-tfal fil-klassijiet fix-xhur tas-sajf, u jnaqqsu wkoll xi ftit mix-xogħol normali tagħhom, huma xorta jkunu impenjati biex jippreparaw għas-sena skolastika ta’ wara. Dan l-impenn ħafna drabi ma jkunx wieħed żgħir.

Kemm huwa importanti li nieħdu dan l-impenn tal-preparazzjoni bis-serjetà! U nieħduh kemm nieħduh bis-serjetà qisu dejjem jibqgħalna x’nagħmlu u xi nħejju biex il-formazzjoni li nagħtu fl-iskejjel tagħna tkun waħda dejjem aktar sħiħa u tirrispetta lill-bniedem li qegħdin nedukaw.

Is-soċjetà li fiha qegħdin ngħixu, u li fiha qegħdin jgħixu wkoll it-tfal li aħna qegħdin nedukaw ukoll tippreżentalna l-isfidi tagħha għaliex hija soċjetà li ma tridx irbit żejjed, u li għaliha kollox jgħaddi, u li ma hemmx differenza bejn għażla jew oħra fuq kull livell. Għaldaqstant, aħna jista’ jkun li quddiemna jkollna tfal li ma għandhom l-ebda interess fis-suġġett, u li qegħdin preżenti fil-klassi għax ma jistgħux jagħmlu mod ieħor. Dan ma għandux jaqtgħalna qalbna, imma jimliena b’ħeġġa u b’impenn akbar ħalli dawn it-tfal ukoll jikbru u jiffurmaw ruħhom f’cittadini onesti u nsara tajbin.

Biex ngħinukom bħala għalliema, l-Uffiċċju tal-Edukazzjoni Reliġjuża qed jipprepara sensiela ta’ laqgħat formattivi. Dawn se jkunu darba bix-xahar, wara l-ħin tal-iskola u jista’ jattendi għalihom min irid, filwaqt li ħadd mhu obbliġat. F’dawn il-laqgħat se nitrattaw diversi temi ta’ interess u li jkomplu jgħinuna nkunu aktar effettivi bħala għalliema mat-tfal tallum. Aktar informazzjoni dwar dawn il-laqgħat nagħtuhom aktar ’l quddiem meta jkollna l-programm finaliżżat.

Filwaqt li nirringrazzjakom bil-quddiem tal-impenn u d-dedikazzjoni tagħkom, nawguralkom sena ta’ ħidma fejjieda bħala għalliema.

Jekk xi ħadd ikun irid jikkuntattjani dejjem jista’ jsibni fuq in-numru 79603872 jew bl-email [email protected]

Għeżież Għalliema tar-Reliġjon,

Ir-Rumani tal-antik kellhom il-proverbju li jgħid li in medio stat virtus jiġifieri li t-triq tan-nofs hija dejjem l-aħjar triq u l-aktar waħda vantaġġjuża. Bħalissa ilkoll ninsabu fiż-żmien tal-mistrieħ fil-vaganzi tas-sajf. Apparti li fis-sħana li tagħmel hawn Malta ftit jibqgħalna ħeġġa u saħħa biex nikkonċentraw fuq il-ħidma impenjattiva tat-tagħlim, irridu nżommu sewwa f’moħħna wkoll li l-mistrieħ huwa neċessarju u mportanti fih innifsu. Dan għaliex il-bniedem mhux maħluq biex jaħdem biss.

Il-mumenti ta’ mistrieħ huma neċessarji biex il-moħħ ukoll jistrieħ, u aktar ’l quddiem nidħlu b’ħeġġa akbar mill-ġdid għar-responsabbiltà tat-tagħlim. Imma dan bħal kull ħaġa oħra jrid isir bil-qies u f’moħħna rridu dejjem inżommu l-fatt li aħna għalliema mhux biss fil-klassi tal-iskola u fil-mumenti fejn inkunu fiżikament fil-kuriduri u fil-bitħa tal-iskola. Aħna għalliema dejjem u kullimkien.

Dan jgħodd għall-għalliema ta’ kull suġġett, imma aktar u aktar għalina li aħna Għalliema tar-Reliġjon. It-tfal li aħna ngħallmu fil-klassijiet tagħna ma jistennewx biss minna li aħna ngħallmuhom is-suġġett, imma li aħna l-ewwel u qabel kollox inkunu xhieda ta’ dak li ngħallmu. Għaldaqstant, aħna ngħallmu ferm aktar bl-eżempju milli bil-kelma. Ejjew noqgħodu attenti għal dan il-fatt, għax dan hu li jagħmilna għalliema awtentiċi, u mhux bil-fomm biss. Dak li jiena nagħmel lilhinn mill-iskola u mill-klassi għandu valur għal dawk kollha li niltaqa’ magħhom, kif ukoll illum fuq il-mezzi tal-komunikazzjoni soċjali moderni. Aħna nafu li xi kultant dellna huwa tqil. Ejjew inkunu konxji ta’ dan ħalli dak li ngħallmu fil-klassi jkun megħjun mill-imġieba tagħna, u mhux imfixkel.

Ejjew nagħarfu din ir-responsabbiltà li aħna għandna u filwaqt li nieħdu l-mumenti meħtieġa ta’ mistrieħ, nerġgħu nimtlew bl-enerġija u l-ħeġġa biex wara l-vaganzi nkomplu fejn inkunu ħallejna b’ħeġġa akbar.

Jekk xi ħadd ikun irid jikkuntattjani dejjem jista’ jsibni fuq in-numru 79603872 jew bl-email [email protected]

Għeżież Għalliema tar-Reliġjon,

Iż-żmien igerbeb u ma jistenna lil ħadd. Donnu jaqbad ritmu li xi kultant jiġri bina. Ikollna ħafna idejat u pjanijiet li nkunu nixtiequ nwettqu, imma nindunaw li minn dak li nkunu ppjanajna, inkunu għamilna fil-fatt ftit. Imma dan ma għandux jaqtgħalna qalbna. L-importanti huwa li dak li nagħmlu nagħmluh tajjeb, u ma nagħmluhx biss biex inkunu għamilnieh, jew għaliex hekk imdorrijin nagħmlu, imma għax tassew nemmnu fih.

Madankollu, meta nħarsu lura naraw li nkunu għamilna diversi affarijiet biex niffaċilitaw u ngħinu lill-oħrajn fil-qadi ta’ dmirijiethom. Dan hu li pprova jagħmel l-Uffiċċju tal-Edukazzjoni Reliġjuża tal-Konferenza Episkopali Maltija bil-għajnuna ta’ ħafna nies oħra. Fost l-affarijiet li qegħdin naħdmu fuqhom imma li huma diġà aċċessibbli hija websajt ġdida li fiha informazzjoni u riżorsi li huma ta’ għajnuna fit-tagħlim. Din il-websajt tinsab f’din il-link: www.cre.knisja.mt

Il-websajt hija kemm bil-Malti kif ukoll bl-Ingliz, u fejn stajna għamilna traduzzjoni ta’ dak li kien possibbli li nittraduċu. Tajjeb li tatuha titwila u taraw x’tistgħu tużaw minnha. Aħna wkoll nilqgħu suġġerimenti biex nagħmluha aħjar.

F’Ottubru li ġej, il-Fakultà tal-Edukazzjoni se toffri ukoll il-kors li jwassal għal grad ta’ għalliem/a (MTL in Religious Education) mhux biss filgħodu imma wkoll part-time filgħaxija. B’hekk min diġà qiegħed jgħallem u għandu dak li hu rikjest biex jagħmel l-MTL ikun jista’ jkompli l-istudji tiegħu mingħajr ma jtellef il-ħidma ta’ filgħodu. Bħalissa l-amminstrazzjoni tal-Università għadha ma fetħitx l-applikazzjonijiet għal dan il-kors. Madankollu, jekk xi ħadd huwa interessat jista’ jkellimni biex ninfurmah meta dawn ikunu aċċessibbli. Jiena dejjem ninsisti li aktar kemm inkunu ppreparati għall-ħidma tat-tagħlim, aktar din tħalli effett fuq l-istudenti tagħna.

Nieħu din l-okkażjoni biex nirringrazzjakom tal-ħidma kollha tagħkom fix-xhur li għaddew.

Jekk xi ħadd ikun irid jikkuntattjani dejjem jista’ jsibni fuq in-numru 79603872 jew bl-email [email protected]

Għeżież Għalliema tar-Reliġjon,

Bil-Malti ngħidu li l-ewwel ma tiekol l-għajn. Dan ma jgħoddx biss fejn jidħol l-ikel li jħajjrek aktar kemm ikun ippreżentat b’mod sabiħ u li jiġbdek. Inħoss li dan jgħodd ħafna għas-sejħa tagħna ta’ għalliema. It-tfal, iħobbu jew ma jinteressawx ruħhom f’suġġett skont kemm ikollhom simpatija mal-għalliem/a; skont kemm l-għalliem/a jagħmlu s-suġġett tagħhom interessanti; skont kemm l-għalliem/a jkunu konvinti minn dak li qed jgħallmu u jgħixuh qabel ma jitkellmu dwaru.

Aħna m’aħniex għalliema ta’ kwalunkwe suġġett imma ta’ suġġett li permezz tiegħu il-bniedem jinfetaħ għal Alla; li permezz tiegħu il-bniedem jiskopri min hu tassew; li fih jitgħallmu li aħna lkoll maħluqin fuq ix-xbieha ta’ Alla, u li fina nġorru din il-marka li tagħmilna differenti minn kull ħolqien ieħor. U hawn nixtieq li nikkwota lill-Papa Franġisku li qalilna li l-insara ma għandhomx ikunu l-poplu tar-Randan imma tal-Għid. Dan ifisser li aħna l-Poplu ta’ Alla salvati bid-demm prezzjuż ta’ Kristu. Għal dan, aħna ma nistgħux inkunu poplu li qisu jonqsu xi ħaġa, għax aħna għandna kollox. Il-ferħ irridu nitrażmettuh lill-istudenti tagħna anki fil-lezzjonijiet li nagħmlu magħhom biex huma jagħarfu dejjem iżjed li aħna l-Poplu li ngħixu u niċċelebraw l-Għid fil-ħajja ta’ kuljum.

Mill-banda l-oħra aħna bħala għalliema ma nistgħux nitrażmettu l-ferħ tal-Għid jekk ma nkunux ferħanin u kuntenti, anki f’dak li nagħmlu ta’ kuljum fil-ħidma tagħna bħala għalliema. Ejjew mela nuru li dak li aħna ngħallmu, aħna qegħdin nippruvaw ngħixuh ukoll, u b’hekk dan il-ferħ u l-entużjażmu li aħna għandna għax skoprejna li aħna maħbubin minn Alla jgħaddi b’mod aktar faċli lill-istudenti li b’mod awtomatiku jitħajjru huma wkoll li jkunu bħalna.

Jekk xi ħadd ikun irid jikkuntattjani dejjem jista’ jsibni fuq in-numru 79603872 jew bl-email [email protected]