Żewġ modi kif ngħallmu

Għeżież għalliema, intom ġejtu fdati b’missjoni sabiħa imma fl-istess waqt impenjattiva ħafna. Illum li tgħallem ir-reliġjon saret sfida impenjattiva. Intom imsejħin tgħinu lill-istudenti isiru jafu dwar il-persuna ta’ Ġesù, il-ħsibijiet tiegħu, ir-raġunamenti tiegħu, is-sentimenti tiegħu, l-għażliet tiegħu. Hekk, l-istudenti jkollhom l-għarfien neċessarju biex jistgħu jieħdu d-deċiżjonijiet tagħhom skont l-età li jkunu fiha.

Dan l-għarfien ta’ Ġesù, l-istudenti tagħkom jagħmluh b’żewġ modi: bit-tagħlim, bir-riċerka u bl-istudju li jsir fil-klassi u barra mill-klassi; u bil-mod ta’ kif intom iġġibu ruħhom magħhom fil-ħin li tgħaddu flimkien. Dawn iż-żewġ modi huma fundamentali biex it-tagħlim tar-reliġjon ikun sħiħ, almenu minn naħa tal-iskola.

Fil-klassijiet tagħkom tiltaqgħu ma’ studenti li għandhom l-esperjenzi sbieħ u koroh tal-ħajja tagħhom. Huma għandhom ix-xewqat, l-inċertezzi u t-tamiet tagħhom. Xi wħud għandhom fuq min iserrħu, oħrajn diġà jgħixu l-esperjenza tas-solitudni. Oħrajn jiġu għandna bi ġrieħi inviżibbli għal min ma jħarisx lejhom b’għajnejn sensittivi. Il-vokazzjoni tagħkom hi li tħarsu lejhom bl-għajnejn ta’ Ġesu: b’kompassjoni, paċenzja u qalb li lesta takkumpanja. Meta tagħżlu li tħobbu lill-istudenti tagħkom, li tirrispettaw id-dinjità tagħhom u tgħinuhom jikbru fil-għerf u fl-imħabba, intom tkunu mhux biss qed twettqu d-dmir tagħkom, imma wkoll tkunu qed twieġbu għax-xewqat l-aktar profondi tagħkom stess: ix-xewqa li tħobbu u tkunu maħbubin, li tagħtu ruħkom, li tieħdu sehem fil-ħajja stess ta’ Alla.

Ġesù jgħallimna li nħobbu lill-oħrajn hija l-unika triq biex ngħixu l-ħajja fil-milja tagħha. Dan jgħodd għall-insara kollha, imma b’mod speċjali għal min huwa msejjaħ li jgħallem il-kristjaneżmu. F’din l-għotja ta’ kuljum tagħkom, kultant mhix rikonoxxuta, kultant b’ħafna għejja, jew mgħobbija bil-problemi u bl-inkwiet personali, hemm it-twettiq tal-vokazzjoni tagħkom. Kull att ta’ paċenzja, kull mument ta’ smigħ ġenwin, kull sforz biex iġġibu tama lill-istudenti, minkejja dak li tkunu għaddejjin minnu intom, isir mod kif Kristu jgħix permezz tagħkom.

Jalla tkomplu tgħallmu b’qalb kbira u fi spirtu ta’ xhieda biex jitwettqu x-xewqat l-aktar profondi li Alla nnifsu żera’ fikom permezz tal-vokazzjoni tagħkom.

Nitlob għalikom.