Issue No: 2/25
Issue No: 2/25
Kelma tal-Isqof
Monsinjur Joseph Galea-Curmi
Isqof Awżiljarju ta' Malta
L-istorja tal-passjoni u l-mewt ta’ Ġesù tħallina bla kliem. Hemm miġbura fiha dak li hu ikrah fil-ħajja tal-bniedem – il-mibegħda, il-vjolenza, l-inġustizzja, il-ħarba mir-responsabbiltà, it-tradiment, iż-żeblieh, l-ingann, l-ingratitudni. Qisu hemm konċentrazzjoni ta’ ħażen li jwassal għall-kundanna inġusta ta’ Ġesù u fl-aħħar għall-mewt brutali tiegħu u d-dfin tiegħu ssiġillat fil-qabar.
Mhux ta’ b’xejn li d-dixxipli ta’ Ġesù għaddew minn trawma, spiċċaw diżillużi, raw kull tama tispiċċa fix-xejn, u raw il-ħażen jirbaħ. Għalihom kien it-tmiem.
Kellhom biss il-memorja ta’ esperjenzi sbieħ, ta’ tagħlim siewi li jagħmel sens, ta’ tant ġid li kienu raw isir minn Ġesù ma’ nies fil-bżonn, mal-morda, mal-foqra, mal-imwarrbin. Mal-mewt u d-dfin ta’ Ġesù, kollox qisu spiċċa fix-xejn bħal ħolma li għaddiet.
Kieku l-istorja waqfet hawn, bir-raġun wieħed jitkellem fuq it-trijonf tal-ħażen, tal-kruha, u ta’ kull raġunament ċiniku fil-ħajja. Imma l-istorja ma ġietx fi tmiemha hawn. Kellha tiġri xi ħaġa oħra li lid-dixxipli ta’ Ġesù tħallihom bla kliem iktar milli ħalliethom il-mewt tiegħu.
Dak inhar li Ġesù, wara l-mewt, iltaqa’ mad-dixxipli tiegħu, ma setgħux jemmnu lil għajnejhom. Hu qam mill-mewt! F’diversi laqgħat oħra magħhom, uriehom b’mod ċar li hu ħaj, li hu għeleb il-mewt. Għalhekk l-Għid hi l-ikbar ġrajja, l-isbaħ festa possibbli għall-umanità, għalina lkoll, għax Ġesù rebaħ il-mewt u qam għal ħajja ġdida.
Ġesù Kristu Rebbieħ hu s-Salvatur tagħna. Bil-qawmien tiegħu, aħna ksibna ħajja ġdida. Miegħu rbaħna aħna. Hi r-rebħa definittiva tat-tajjeb fuq il-ħażin, tal-ħajja fuq il-mewt, tal-imħabba fuq il-mibegħda.
Bil-qawmien tiegħu, Kristu jagħtina s-sinifikat veru għal ħajjitna, u għal dak li għandna nirsistu għalih. Jurina xi tfisser tirbaħ u xi tfisser titlef fil-ħajja. Aħna mifdija minnu, aħna mexjin wara rebbieħ. Għalhekk, nafu li t-triq li hu wriena hi t-triq rebbieħa. Hi t-triq li ma twassalx biss sal-qabar imma tmur lil hinn mill-qabar, u tieħu sal-ħajja ta’ dejjem.
Hi rebbieħa għax hi vera f’din il-ħajja stess, fejn iġġib il-veru ferħ u paċi. Għalhekk meta aħna nagħżlu t-triq tal-imħabba, tal-maħfra, tal-onestà, tal-ġustizzja, tal-paċi, tal-għaqda, tal-għożża tal-ħajja, qed nagħżlu t-triq rebbieħa. Hi t-triq li jurina Kristu ħaj, u għax rebbieħa, hi t-triq tas-suċċess veru, tat-tama li ma tqarraqx bina.
Il-Mulej iberikkom.
Mill-Iskejjel
Living Love Joyfully
Esperjenza għall-istudenti tat-tmien sena!
Iż-żmien tal-adolexxenza jaf ikun żmien turbolenti, fejn wieħed jibda jesperjenza bidliet li forsi magħhom iġibu inċertezzi u dubji, u għalhekk ikun żmien fejn persuna tibda tistaqsi aktar mistoqsijiet dwarha, dwar l-eżistenza tagħha, u wkoll dwar Alla. Għalhekk jeħtieġ li f’din il-fażi tal-ħajja wieħed ikollu gwida biex ikun jista’ jifforma fi bniedem sħiħ u jilħaq il-potenzjal tiegħu.
Permezz tal-esperjenza Living Love Joyfully, f’Dar San Ġużepp f’Santa Venera, l-istudenti tat-tmien sena kellhom nofstanhar flimkien fejn kienu mħejjija diversi attivitajiet għalihom. Huma bdew l-ewwel sessjoni billi saret logħba biex isiru jafu aktar lil xulxin. Wara ġiet irrakkontata storja billi l-mexxejja animawha u tawha l-ħajja. L-istudenti kellhom iċ-ċans fi gruppi iżgħar jiddiskutu u jaraw kif huma wkoll jistgħu jirrelataw din l-istorja mal-ħajja tagħhom, issa li huma wkoll qed jagħmlu xi bidliet. Parti mill-attività kienet tinvolvi wkoll spazji ta’ talb f’ambjent kalm u seren, u li matulhom l-istudenti jkunu jistgħu jirriflettu, isibu lilhom infushom, jifhmu r-relazzjoni tagħhom ma’ dawk ta’ madwarhom, u finalment jiskopru s-sens ta’ Alla f’ħajjithom.
Matul dawn l-attivitajiet l-istudenti jkollhom iċ-ċans li jikbru u jiżviluppaw, kemm personalment u fil-komunità li huma jgħixu fiha, u wkoll spiritwalment. Għalhekk, l-għan ta’ dawn is-sessjonijiet hu li l-istudenti jagħrfu l-valur u s-sens tal-gratitudni lejn xulxin, japprezzaw aktar lilhom infushom, jifhmu li kull wieħed u waħda minna huma ħolqien ta’ Alla u maħluqa b’mod uniku u speċjali għalih, jiskopru l-abiltajiet tagħhom filwaqt li jifhmu l-limitazzjonijiet, u wkoll li jifhmu l-importanza li jibqgħu reżiljenti quddiem il-bidliet u l-isfidi li issa li qed jikbru ser jibdew jiltaqgħu magħhom.
Din l-esperjenza tkabbar lill-istudenti fl-ispiritwalità, u tgħinhom jirrealizzaw il-valuri u l-aspirazzjonijiet tagħhom permezz ta’ proċess biex ifittxu s-sens ta’ skop f’ħajjithom. Hija bħal għodda biex ikunu preparati jiffaċċjaw l-isfidi f’ħajjithom b’qalb miftuħa, b’għarfien u b’għaqal, biex jagħrfu jagħmlu deċiżjonijiet morali għall-ġid tagħhom u tal-oħrajn.
Wara esperjenza bħal din ma tridx wisq biex tirrealizza li l-istudenti għandhom għatx għal spazji fejn jieqfu u jirriflettu ftit, u tant jibbenefikaw minn esperjenzi simili, li ħafna jkunu jixtiequ jerġgħu jiġu u jesperjenzaw dawn il-mumenti li għalkemm qosra, joffrulhom ftit kalma u kuntentizza li fil-ħajja mgħaġġla ta’ kuljum mhux dejjem isibu.
Ritianne Frendo
Għalliema tar-Reliġjon fil-Kulleġġ San Ġorġ Preca, Skola Medja, il-Blata l-Bajda.
Hekk kif din is-sena qed nassistu għall-kanonizzazzjoni ta’ Carlo Acutis, qegħdin inħeġġu lil kull min għandu għal qalbu lil dan il-qaddis żagħżugħ biex jassissti għal dan id-dramm imsejjes fuq il-ħajja tiegħu. Minbarra r-rappreżenazzjonijiet ta’ filgħaxija bejn il-Ġimgħa u l-Ħadd, 24-26 t’Ottubru, se jsiru wkoll żewġ rappreżentazzjonijiet għal tfal tal-iskejjel nhar l-Erbgħa 22 u l-Ħamis 23 t’Ottubru 2025 filgħodu. Dawk l-għalliema, b’mod partikolari għalliema tar-Reliġjon li huma interessati jġibu numru ta’ klassijiet biex jaraw id-dramm, jistgħu jagħmlu dan minn issa, billi jċemplu fuq in-numri li jinsabu fuq il-poster. Ir-rappreżentazzjonijiet se jkunu qed isiru fit-teatru taċ-Ċentru Parrokjali San Ġużepp Ħaddiem, Birkirkara.
Avvizi mill-Ispiritual Development in Schools
Nhar l-Erbgħa 16 ta’ April 2025, tista’ tagħżel siegħa bejn it-8:30 am u 1:30 pm biex tieħu sehem f’attività spiritwali apposta għall-edukaturi. Ser issir fil-Kurja tal-Arċisqof, il-Furjana. It-Tema hija: Finding Way to Hope. Ser ikun hemm opportunità ta’ ġabra, riflessjoni, talb u qrar.
🛑 Ibbukja postok għax malajr jispiċċaw: https://sds.mt/labyrinth25
Jekk animajt jew ser tanima xi prayer space, nixtiequ nkunu nafu l-esperjenza tiegħek! Kemm nirringrazzjaw lil Alla għal dak li jsir f’ħajjet l-istudenti u l-edukaturi. Għidilna bih f’din il-link: https://sds.mt/register-prayer-space
Tista’ ssegwi f’liema skejjel qed isiru prayer spaces f’dal-ġimgħat: https://sds.mt/prayer-spaces/
Tixtieq tintroduċi xi attivitajiet ta’ talb? Akwista Prayer Spaces Kit. idħol hawn u applika: https://sds.mt/resource/prayer-spaces-kit/
Tkun verament esperjenza sabiħa meta Mons Arċisqof Charles Scicluna jew l-Isqof Joseph Galea Curmi jżuru skola biex jiddjalogaw mal-istudenti u l-edukaturi. Ikunu mumenti fejn l-Isqfijiet u l-istudenti isiru iktar qrib tagħhom u jkollhom iċ-ċans jsaqsuhom mistoqsjiet jew jaqsmu l-esperjenzi tagħhom.
Billi d-djarji tal-Isqfijiet jimtlew malajr, jekk tixtieq li bħala skola tistiednu lil Mons Arċisqof Charles Scicluna jew l-Isqof Joseph Galea Curmi matul is-sena skolastika 2025-2026, imlew din il-formola minnufih.
Nixtieq l-ewwelnett nirringrazzjak tas-sehem u s-sapport li tagħti fl-organizzazzjoni tal-Eżerċizzi Spiritwali fl-iskola. Min jaf kemm isir ġid! Kif tafu das-snin inbidel il-mod kif animaturi japplikaw għal remunerazzjoni
Il-formola għar-remunerazzjoni li għandhom jimlew l-animaturi tal-Eżerċizzi Spiritwali hija: https://sds.mt/remuneration-form-submission/
Żur il-Website tal-Edukazzjoni Reliġjuża:
